كتب-محمد خلف
ريفيو اتأخر شويه رغم اني وعدت بيه لعمل لاقى هجوم شرس من قبل حتى ما يقرأ او ينزل السوق لكتاب ريهام شعبان “الفتاة السيئة” ..
الوان الغلاف وتصميمه في الانطباع الاول شفته بيعبر عن حزن.. الازرق بدرجاته مع الصوره الجانبية لبنت بتبص للفراغ بعيون نص مقفوله بتوحي باليأس، الشعر المش مترتب بيعبر عن عدم تقدير للذات، الاكتاف العاريه والحلق في الانف حاجات بتوحي بحياه مستهترة.. كل دا مع الاسم “فتاة سيئة” كونوا وحدة مترابطه تحسب للعمل ودار الكنزي الي تولت نشره..
الكتاب عباره عن ٣٠ نص نثري اقرب لرسائل موجهة لشخص ما تتفق في نقل احاسيس تحملها شخصية المتحدث “مش بالضروره الكاتبه” ما عدا نص واحد اسمه (ست الحسن والجمال) لانه رد على لسان ذكر بيرد على النص السابق ليه (الشاطر حسن) ودا خلاه نص شاذ عن باقي نصوص الكتاب..
الاسلوب سلس فيه تنوع في المفردات والتراكيب والصور البلاغيه عابه تكرار المفردات بشكل كبير واستخدام مفردات غريبه على القاموس المعتاد زي شهور تشرين وايلول ودا تقويم معظمنا ميعرفوش وهي هندها نص اصلا اسمه”في ديسمبر فدا عمل خلل في وحدة قاموس العمل.. ونباتات زي الليلك الي استخدمته اكتر من مره فاضطريت اعمل سرش عشان اعرف انه نبات زهري من فصيلة الزيتون..
في النهايه لازم اقول ان الكتاب دا كان استثناء بالنسبه ليا بسبب الآتي..
اولا: مبقراش خواطر ومبعترفش بيها شكل ادبي لان ملهاش قواعد ولا اسس ومعظم الي بيكتبها بيهري..
ثانيا: مبقرأش لبنات اصلا لان كل كتاباتهم شبه في الافكار والتناول والاسلوب..
ثالثا: النقد القاسي الي متعود عليه والناس متعوده عليه مني مينفعش في الحاله دي لانها في مرحله بدائيه جدا التوجيه هيكون افيد بكتير بالنسبه ليها
رابعا: الاسلوب السردي والصور البلاغية الجميله الي شفتها في الكتاب بتقول ان في قاصه قويه جدا في الطريق لو هي اختارت الطريق دا واهتمت بتعلم الاسس وجربت في انواع القصه بنفس الجرأه الي طرحت بيها الكتاب دا.. الصور بتقول ان ممكن يكون في شاعره لكن معتقدش انها هتكون مميزه في الشعر زي القصه
