رياضةمحليات

عشرة اسباب تخليكم تحطوا وشوكوا فى الأرض .. وتغورا من سكتنا

Advertisements

كتب / علي حسن

1- معايرة النادى بان الادارة تولت المهمه فى ظروف صعبه “مع ان الناس كلها عارفه ان اصعب فتره كانت فتره ياسر يحي ” وكل الناس عارفه ان طول عمر النادى عايش في فترات صعبه ومش هوه لوحده ده الاتحاد والاسماعيلي وغيرهم من الاندية الجماهيرية حياتهم كلها صعبه طول ما في اهلي وزمالك وده يدل انكم محدثين في الادارة واي حاجة ايجابيه ليكم بتفرحوا بيها وتلبسوا البدل وتطلعوا فى القنوات والإعلام وتقولوا عملنا وعملنا .

2- الإنشاءات اللى حصلت فى النادى تاريخية فعلاً محدش يقدر ينكرها , بس كلها كان وراها بيزنس كبير ولعب من تحت الترابيزة وكله جاي بالمستندات وخصوصاً ارض نادي الغزل .

3- حجب ومنع وشطب وتبليغ للجهات الامنيه عن عدد كبير جداً من الجماهير والصحفيين واي حد بيحاول يهاجمكم مصيره العداوه , وكمان انشاء لجان الكترونية من ال”القبيضه” تدافع عن فطاحل مجلس الإدارة.. الله يرحمك يا حاج سيد يا متولي كان المدرج كله لما يشتمك تطلع تقول ولادي وبيعتبوني !!

4- مشكلة اللاعب بانسيه والرسايل اللى كانت بتتبعتله علشان ينشرها على صفحته وقصص وحواديت مينفعش تتقال على الملأ اكتر من كده لاني متشرفش حد منكم يعمل بلاغ ضدي بعدم وجود دليل .. بس الورق جاي وكله هيتحاسب .

5- غياب عنوان النادى المصرى ( النادي المصرى للألعاب الرياضية ) بقينا فريق كوره وبس وانا عارف كويس ان دايماً احنا طول عمرنا بنهتم بالكورة والفريق الاول ولكن هنفضل كده لحد امتي ؟ فين افكاركم فين شغلكم ؟ , احياناً يطلع فريق الهوكي او الجودو يشرفنا باجتهاداته الشخصية ولكن اين الإدارة من اسم ” الالعاب الرياضية”

6- الإطاحه او بمعني ادق عدم تهيئة جو مناسب للعمل لبعض اعضاء مجلس الإدارة ولبعض المحبين والمتطوعين للعمل فى خدمه النادى المصرى سواء بشئون المجلس وقراراته وملف المئويه والناشئين او بالمركز الإعلامي او النادي الإجتماعي .

7- قضية بورسعيد والعودة للعب على الاستاد قضية رأي عام مشوفناش منكم غير تصريحات مزيفة لحد ما حصلتوا على لقب ( حنفي ) وضيعتوا هيبه النادي واصبحنا اضحوكة.

8- فشل زريع فى توفير بدائل للاعبين الراحلين وعدم التعاقد مع اللاعبين الذي تم طلبهم من قبل الجهاز الفني بسبب المبالغه فى اسعارهم ؟؟ امال انتوا جايين تعملوا ايه وفين شغلكم انتخبناكوا ليه ؟؟ بتجربوا فينا !!! مش عايزين تدفعوا مليم !! فين فلوس الشركة الراعية فى الدوري والكاس وكأس السوبر والكونفدرالية والبث التليفزيوني وبيع احمد منصور وحمدي ومكافئة بطولة الكونفدرالية بالوصول لقبل النهائي ؟ ودعم المحافظة ودعم مديرية الشباب والرياضة خصوصاً المهندس خالد عبدالعزيز.. ملاايين راحت فين عمتاً الكلبشات جاهزه يوم الجمعية العمومية .

9- قبل الانتخابات الاخيرة طلع رئيس النادي بتصريح يقول فيه انه فى مسئولية كبيرة وتعب منها وعايز يمشي .. يقوم بعدها يمسك فى الكرسي بايده وسنانه ويخدع مرشح الرئاسه الاول ليه ويقنعه يبقي نائب ليه ويخلي بيه فى الاخر والمرشح التاني اللى قصاده يرفع قصاده بدل القضيه عشره وبدل الطعن 100 … بسبب ايه موتك ع الكرسي غير ان فى ريحه وحشه وحاجة مش طبيعيه خصوصاً انه عارف انه مكروه بين الجماهير.

10- اخيراً والقشة التى قسمت ظهر البعير .. التعنت والضعف وعدم الحفاظ على الجهاز الفني السابق صاحب الانجازات الحقيقية , الجماهير كلها اقتنعت ووضحت ليهم الصورة وضوح الشمس ان حسام حسن هو اللى كان ساتركم بعد ربنا وانه كان الرئيس الفعلي للنادي رغم تحفظ بعض الجماهير على شكل النادي وضياع هيبته بعدم وجود اداره الا ان الجماهير كانت سعيده وراضيه طول ما الفريق الاول ماشي كويس .. جيبتوا ابن البلد ميمي عبد الرازق وحتطوه فى وش المدفع فى مناخ سيء وتوقيت مميت مفيش مخلوق يقدر يشتغل فيه طول ما نفوسكم مريضه .

اخيراً وليس آخراً الكل مذنب ( ادارة وجمهور ولاعبين ) ولكن لما صاحب البيت يغلط كل اللى فيه بينهار وانتم كأداره اصبحتم وباء ولازم يحصل بتر سريع .. ونهايتكم مش هتبقي اقاله وبس .. هتبقي سجن والايام بينا (الجمعية العمومية).

ملحوظة الأمن والمحافظ مش هيحميكم لان جمهور المصري مش همجي وهياخد حقه بالقانون

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى