يكتبه / د.محمد ابو زيد
…….
حفرة فى شارع ضلمه ، كل اللى بيعدى عليها يقع فيها ورجليه تنكسر ، إتلموا سكان الحى وقالوا لازم نشوف حل للمصيبه دى ، كل يوم عدد المصابين بيزيد !!
قام ناطط واحد من السكان وقالهم بصوت عالى .. إحنا لاااازم نبنى #مستشفى جنب الحفرة دى .🏥
وكانت المفاجأة ان كل السكان إستحسنوا الفكرة وابتدوا بالفعل يلموا من بعض ويبنوا المستشفى .⛩️
بعد فترة المستشفى خلصت وعدد السراير اتملى بالمصابين ، فقرروا يعملوا حملات #تبرعات كبيرة فى الصحافة واﻹعلام علشان يكبروا المستشفى ويزودوا عدد السراير ، ومن كتر السخاء والكرم بتاع المتبرعين (اللى عارفين حكاية الحفرة برضو) طمع أهل الحى فى انهم يعملوا اكبر مستشفى فى العالم لعلاج مصابى “الحفرة”
وتوالت الايام والشهور والسنين وعدد المصابين بيزيد وحجم المستشفى بيكبر والتبرعات لا تتوقف.💰💲💵💴
على الرغم إنهم يمكن لو كانوا فكروا من الاول فى ردم #الحفرة كان زمانها اتقفلت ، ولو كان ردمها صعب ، على الاقل كانوا قسموا المجهودات والتبرعات على الاتجاهين بالتساوى والتوازى.
– زى ما بنعمل حملات نلم بيها مئات الملايين لعلاج مصابي #السرطان وفيروس سي والفشل الكلوي كنا دورنا ازاي نشيل ونقضي علي مسببات السرطان وفيروس سي والفشل #الكلوي من المياه والاكل وكل شئ سبب #الامراض دي وكمان كنا صرفنا التبرعات دي علي ابحاث علميه ننتج بيها ادويه او سلاح او ابحاث زراعيه نطور بيها اكلنا وشربنا كان هايبقي حالنا غير الحال 🙄
– المليارات اللى لمتوها على مدار سنوات لو كان إتصرفت صح كان زمان مصر دي ليها شأن اخر لو كنا صرفنا بس ربعها على البحث العلمى كنتوا عملتوا ثورة علمية قلبت كل الموازين.
– فكروا إزاى تسدوا الحفرة وانتوا بتعالجوا المصابين بسببها.
– مش مسابقه هى فى عدد السراير اللى هتوفروها للمصابين .
– مش حاجه حلوة ولا مدعاه للفخر انك بتعمل اكبر مستشفى للسرطان فى العااااالم .
– اهتم بالطب البيطرى و الهندسه الزراعيه وانت هتلاقى اكلك من أصل نباتى أو حيوانى سليم جدا .. لأن ٨٠٪ من الأمراض اللى بتصيب الانسان من أصل حيوانى والباقى من أصل نباتى
