كتب- احمد تاج
في فيلم اسماعيل يس في مستشفى المجانين ..الخواجة بيجو كان بيملي سمعة جواب …و وقفوا في كلمة مش عارفين يكتبوها عن الصوت اللي بيمشوا بيه الحمار …و تدخل عبد الفتاح القصري و ملوا الدنيا ورق في مشهد معروف ….
و احنا انضحك علينا و صدقنا انها ما ببتكتبش ….
الواقع انها بتتكتب …و هي حرف …و ليه اسم و ليه كتابة !!!
في خمس اصوات طرقعة اسمها clicks بتدخل في اللغات المحلية و القديمة في افريقيا و امريكا الشمالية …
الحرف ده تحديدا اسمه “تشكليك”
و صوته هو alveolar lateral او بالعربي سنخ جانبي … يعني صوت صادر من اجناب اللسان على اطراف سقف الفم الخارجي ….
طب بيتكتب ازاي ….كده ||
– الحمار ..حُرُن ..و كل ما اقول له ||..||..|| ميرضاش يمشي
و بالمناسبة صوت البوسة ( القبلة ) كمان كليك …
و هي حرف اسمه “بتس”
صوته هو bilabial click او بالعربي ازدواج شفاهي نقري
طيب بيتكتب ازاي ….كده ʘ
و صوت الرفض كمان (تؤ تؤ تؤ ) هو حرف اسمه “تست” زي حرف z بالألماني
و صوته اسمه dental click يعني طرقعة سنّية
و بيتكتب ازاي …. كده |
يعني في الفيلم البطل ʘ البطلة و هي قالت له |.. |.. |
دراسة اللغات ……متعة
