حاورتها / نهى طه
احيانا تكون الصدفه بدايه لمشوار نجاح سيده استطاعت ان تصنع من الحلى والاكسسوار اسم وماركه تخلد تعبهاحققت طفره فى مجال الهاند ميد وعملت لنفسها بصمه حلوه بهذه الصناعه هى الفنانة ماهى السيد عثمان وكان لنا معها هذا الحوار الممتع …
- كيف عرفتى انك موهوبه؟
- والله الموضوع كان صدفه بحته عرفت مكان اشتريت منه شويه خامات على ادى عملت كام انسيال عجبو اصحابى جدا بعدها اخدت ثقه في نفسى واشتغلت
- كيف بدأت الفكره معاكى؟
- فكرت ليه ميكونش دا مجال ليا اشتغل فيه ويكون مصدر دخل واطوره لحد ما يبقا ليا براند بأسمى ف حطيت دا هدف واشتغلت عليه
- مين اول حد دعمك؟
- بابا الله يرحمه هوا صلا فنان تشكيلى ف كان رأيه مهم جدا جدا ليا وحقيقى كان معايا على طول وانا بشترى الخامات عشان يدينى رأيه. طبعا اسرتى كلها دعمتنى واصحابى بس بابا كان الأساس بالنسبالى عشان الجانب الفنى مهم ورأيه لا غبار عليه
- شغل الهاند ميد غالبا بيكون صعب مش اى حد يقدر يشتغل فيه كيف تطورتى الفكره واشتغلتى على نفسك ؟
- الهاند ميد محتاج صبر وطوله بال وذهن صافى عشان تقدرى تصممى موديل كوليه مثلا مش كوبى وبيست من اى حاجه بتشوفيها وخلاص ف الموضوع ف الاول لانى اكتشفت انى حباه اوى مكنتش بشعر بأى تعب وارهاق لكن التحدى الاكبر فعلا هو الاستمراريه لانى زى ماقولتلك هدفى إن دا يكون مجال مش مجرد هوايه يعنى لازم استمر ودا لوحده كان بمثابه تمرين للنفس على الصبر الطويل جدا.واكيد بقيت اتابع كل المصممين من اول الجديره بالذكر عزه فهمى لحد مدرسه مصاغ. عشان اقدر اوسع دايره افكارى وازاى اشوف الناس بتشتغل واتعلمت من متابعتى كتير الحقيقه
- المعروف إن شغل الهاند ميد دايما بيكون غالى ما السبب؟
- اكيد عشان بياخد وقت ومجهود كبير في الشغل كل ما الحاجه بتاخد وقت وحرفيه اكتر فى الصنع بتكون اغلى فى التمن. بالاضافه الى التصميم طبعا كل ما كان مختلف بيكون اغلى
- هل فى اقبال على شراء شغل الهاند ميد؟
- الحمد لله دا بيعتمد على اد ايه الشغل مميز فاالعمليه لما مش بتلاقي الاختلاف دا برا لازم هتضطر تجيلك ودا لوحده تحدى انك تحافظى على التميز عشان تحافظى على العملاء بتوعك
- ما هى الصعوبات التى واجهتك فى هذا المجال ؟
- محاربه الغلاء لان زى ما كل حاجه غلت جدا والهاند ميد انتشر جدا بيكون فى حرب شرسه عشان تقدرى تحافظى على اختلافك فى الوقت ال فيه معظم ال اشتغلوا هاند ميد بياخدوا شغلك وينفذوه كوبى وبيست
- ما هو اغرب تصميم قومتى بتصميمه؟
- من وجهه نظرى انا بعيدا عن رأى العملا تصميمات دخلت فيها اللون الدهبى والفضى مع بعض وتصميمات تانيه دخلت فيه نوعيات من القماش مبروم كدا بشكل معين عملت منه حاجات حلوه جدا قريبه من قلبى اوى
- هل شاركتى في معارض؟
- شاركت في نوعيات من الاسواق هنا في بورسعيد واتعرض عليا من القاهره اشترك في كذا معرض بس ولامره التوقيت كان مناسب لحد دلوقت
- ما هو شعورك عندما شاركتى فى بعض البرامج التلفزيونيه؟
- مش هقولك قمه النجاح لان هدفى مكنش خالص التلفزيون والله.الموضوع دا جه لوحده لكن اولا كنت فرحانه جدا جدا أن بابا وماما وابنى واخواتى فخورين بيا. ثانيا كانت تجربه جديده اتعلمت منها كتير واشتغلت عشانها اكتر بعد كدا لما اتكرر طلب تصوير حلقات
- هل عندك مفاجأت للسنه الجديده؟
- اكيد باذن الله تصميمات مختلفه ربنا يسهل بأذن الله
- ماهى امنياتك الشخصيه للسنه الجديده2020؟
- ربنا يخليلى ماما وابنى واخواتى وصديقتى ايمان. وكل الناس سعيده وفرحانه دايما. وربنا يرحم والدى برحمته الواسعة .
