الجزء الأخير و الأكثر تشويقآ من الحوار الصحفي الساخن عن أسرار السياحه في مصر

الجزء الأخير و الأكثر تشويقآ من الحوار الصحفي الساخن عن أسرار السياحه في مصر مع الخبير السياحي نبيل حسين و الاعلاميه المتألقه دكتور صافي يونس

*** السؤال الأساسي لأي حد يشتغل: هل عايز تكمل في المهنة ولا مجرد شغل مؤقت؟

لو عايز تكمل هتنجح وهتتعلم بسرعة.

لكن لو مؤقت، الموضوع مختلف.

في ناس بدأوا من الصفر ووصلوا لمديرين فنادق وشركات. كلنا بدأنا ستاف صغير، نعيش ونأكل مع باقي العمال.

زمان قبل 1999 كانت للسياحة قيمة، حتى تغيير الزي الرسمي كان بيُعتبر حدث.

* لكن دلوقتي الوضع اختلف، وسمعت من سياح إن شرم الشيخ بقت شعبية جدًا، وده كان صادم. إيه الفرق بينها وبين الغردقة؟

*** شرم منطقة جميلة، لكن قربها من الأحداث في سينا وغزة أثر عليها.

أيام مبارك كان بيهتم بشرم وخلّاها جنة.

بعد يناير حصلت مبادرات سياحة رخيصة من وزارة الشباب، لكنها أثرت بالسلب بسبب سوء التنظيم وسوء الاستخدام.

الدولة حاولت تعيد مكانتها عبر مؤتمرات الشباب والمهرجانات، لكن ظلّت متأثرة.

في المقابل، الغردقة والجونة صعدوا بفضل مهرجان الجونة اللي عمل دعاية قوية لمصر من 2016.

* وسهل حشيش؟

*** سهل حشيش منطقة بكر وجميلة جدًا، بدأت تنمو دلوقتي لكن لسه عليها إقبال بحذر.

* إيه توقعك لمستقبل السياحة في البحر الأحمر؟

*** بعد كورونا، السياحة بدأت تستعيد نفسها من 2023.

2024 كان أفضل، وفي 2025 الموسم قوي، بنحقق زيادة 24-25% عن السنة اللي فاتت.

وصلنا لـ 17 مليون زائر ونستهدف 18 مليون مع نهاية السنة.

* لكن ليه مصر متهمة إن سياحتها “عنصرية” أو غير متنوعة، مثلاً في السياحة الرياضية؟

***عندنا ضعف في التخطيط السياحي.

بنسوّق لمصر على أساس السعر، وده ظلم كبير.

لازم نعرض نقاط قوة كل منطقة في معارض عالمية زي لندن وروسيا.

*طيب موضوع إدارة الفنادق؟

*** حوالي 50% من فنادق الغردقة تُدار مباشرة من أصحابها.

لكن مش كل صاحب رأس مال يصلح يدير فندق، لأن الإدارة علم ومنظومة.

فيه فرق بين رجل الأعمال السياحي والتاجر.

شركات الإدارة المحترفة لازم يكون لها دور أكبر.

أحيانًا بنرفض إدارة فنادق حتى لو مربحة، لو المالك نفسه بيدور على الربح السريع أكتر من سمعة السياحة.

أتمنى وزارة السياحة تصدر قانون يلزم الفنادق بالاستعانة بإدارة متخصصة.

*** الفنادق في مصر لازم تدار عن طريق شركات إدارة متخصصة لأن وزارة السياحة لما بتدي ترخيص لشركة بتشترط مقومات معينة
أهمها إن الموظفين يكونوا مدربين ومدير الشركة فاهم، وده بيخلي إدارة الفنادق منظمة.
إنما بعض الفنادق بتدار بشكل عشوائي وده بيعمل كوارث في العمالة وفي رضا النزلاء وحتى في سلامة النزيل.
تخيلي لو حصل ضرر لنزيل، ده ممكن يضر بسمعة البلد كلها.

* اللي بيضايقني إني لما بروح فندق مع ضيف أجنبي وألاقي الإدارة مصرية بيكون فيه مشاكل في المعاملة والصيانة،
بينما لو الإدارة أجنبية بتبقى الخدمة أحسن. المفروض إحنا نخاف على استثماراتنا أكتر من الأجانب، لكن هم أنجح. إزاي نفسر ده؟

***السبب إن الإدارة الأجنبية عندها خطط واضحة للتشغيل والصيانة والتدريب. في مصر عندنا قدرات، لكن التنفيذ ضعيف لأن صاحب المال بيبخل على المصاريف وعايز يكسب بسرعة، فمفيش استثمار حقيقي في الصيانة أو التدريب.

وده بيبان في القرى السياحية والفنادق الصغيرة اللي إدارتها ضعيفة وأسعارها غير مناسبة. كأن السياحة بقت موجهة لفئة معينة بس.

* فعلاً، في الغردقة مثلاً الفنادق اللي بتدار عن طريق شركات إدارة سواء مصرية أو أجنبية بتلاقي فيها نظام واضح وسياسات ومعايير ثابتة.
عشان كده أنا بطالب وزارة السياحة تلزم كل الفنادق إنها تكون تحت إدارة متخصصة.
أكبر مشكلة عندنا هي الصيانة، أصحاب الأموال مش شايفين أهميتها إلا بعد ما تحصل كارثة.
المفروض نكون بروأكتف، يعني نتوقع المشاكل قبل حدوثها ونمنعها بالبنية التحتية الجيدة والتدريب المستمر.

*يبقى الحل إننا ما نستناش الكارثة، لكن نمنعها من البداية. وده محتاج رؤية طويلة المدى.

*** بالضبط، محتاجين وزارة السياحة تلزم الفنادق بخطط تدريب وصيانة واضحة، وتضمن إن كل العاملين مدربين قبل استلام الشغل.

* ده موضوع كبير، مش مجرد مكان سياحي جميل، لكن قضية معقدة جداً. وبصراحة بدأت أتعاطف معاكم بعد ما عرفت حجم التحديات.

*** 80% من الشباب في المجال دلوقتي متعلم وفاهم، وده أمل إن المرحلة الجاية تبقى أفضل.

* خلينا نوجه رسائل سريعة لبعض الشخصيات. للرئيس السيسي؟

*** ربنا معاك ويقدرك علينا.

* للشعب المصري وخاصة الطبقة الوسطى اللي تأثرت؟

*** لا تعليق، كأنها اختفت.

* لرئيس الوزراء القادم؟

*** رسالتي مفهومة للي فاهم.

* طيب لوزير السياحة؟

*** من زمان ما كانش عندنا وزير سياحة قوي، آخرهم أسماء كبيرة زي ممدوح البلتاجي ومونير فخري عبد النور.

*طيب ليه ما يكونش وزير السياحة امرأة؟

*** جُرّبت قبل كده وفشلت، مش لأنها امرأة لكن الظروف ما ساعدتهاش. بالعكس، دور المرأة مهم لكن السياحة قطاع صعب وعايز منظومة محترفة مش موظفين حكومة.

* لكن التطوير اللي حصل في التفتيش على الفنادق باستخدام التكنولوجيا واللابتوب خطوة كويسة.

*** فعلاً، التفتيش بقى أونلاين ومنظم وده سهل حاجات كتير، أتمنى التطوير يستمر.

*طيب رسالة لمستثمرين مصريين بيحطوا فلوسهم في السياحة بره مصر؟

*** الأفضل يستثمروا في بلدهم، لكن للأسف البيروقراطية والضرائب العالية بتخليهم يهربوا.

* يعني الموضوع مادي وإجرائي.

*** آه، رأس المال دايمًا بيدور على المكان الأسهل في الإجراءات، حتى لو الأرباح أقل.

* طيب بالنسبة للسياحة العلاجية والدينية؟

*** موجودة في سيوة والغردقة وسانت كاترين، وكمان عندنا كنوز ضخمة للسياحة الدينية لكن غير مستغلة خالص.

* يبقى محتاجين ثورة جديدة في إدارة السياحة.

*** أكيد، لازم السياحة تدار بشكل احترافي أكتر.

* قبل ما نختم، تحب تقول كلمة لفريق العمل اللي اشتغل معاك وحقق نجاح في المكان؟

*** أنا فخور بيهم زي أولادي، وبسعى أخلي الموظفين مبسوطين عشان الضيوف يكونوا مبسوطين. النجاح ده بفضلهم وبفضل الأونرز اللي فاهمين قيمة تطوير القطاع.

* وأنا كمان بشكركم، والتكريم اللي حصلتوا عليه مستحق. مصر هتفضل أحلى بلد وشعبها قوي رغم التحديات.