في وقت معين، بنصحى من النوم ومبقاش في نفسنا حاجة. لا اللي كنا بنحبه بيحمّسنا، ولا الحاجات اللي كانت بتفرحنا بقت تفرق معانا… كأن الروح نايمة، والقلب مطفي.
فقدان الشغف مش كسل، ومش ضعف، ده صوت داخلي بيقول “أنا تعبت”…
تعبت من كتر المحاولة، من التكرار، من الخيبات، ومن الإحساس إنك بتجري بس مش واصل.
ناس كتير بتمر بالمرحلة دي وبتتكسف تقول، مع إنها إنسانية جدًا…
والمصيبة إن المجتمع ساعات بيضغط عليك أكتر، يقولك “شد حيلك، قوم، ارجع زي زمان”
طب ما أنا نفسي أرجع، بس في حاجة جوايا مش راجعة!
الحقيقة؟
الشغف مش بيضيع، هو بس بياخد أجازة… يمكن علشان نراجع إحنا ليه بدأنا من الأول؟
إحنا ليه حبينا الحاجة دي؟ وإيه اللي خلانا نحس إنها بتكملنا؟
فلو أنت دلوقتي مش حاسس بحاجة، مش لوحدك.
خد وقتك، حاول تهدى، ابعد لو لزم الأمر، بس أوعى تقول على نفسك فاشل.
الشغف بيرجع… بس بيرجع لما نسمح لنفسنا نرتاح ونسمعها.
