بقلم المستشار احمد فتحي
1) اعلانات الملابس الداخلية اللي بتطلع لنا افراد فرحانين و بيرقصوا باللبس ده في حين اننا بنقول للطفل دي خصوصية و محدش يشوفك باللبس ده و متقلعش قدام حد … فالأعلان جايبين اطفال بتقلع قدام الكاميرات عادي !! ازاي الأم او الأخصائية هتعلم الطفل يعني ايه خصوصية بعد كدة … سؤال شاغلني جدا
2) اعلان كنتاكي .. حفيد بيطلب من جدته ٤٩ ج عشان يجيب وجبة كنتاكي و بيكلمها بمنتهي الندية و التذمر و بينتهي الاعلان ان بانر بيقع علي راسها و الطفل جاب الوجبة و قاعد بياكلها و بيضحك لنا ضحكة سمجة !! الاعلان ده كله غلط المفروض يترمي في اقرب باسكت … مش بس بيشجع الصغيرين انهم ياكلوا فاست فود لا كمان بيعلمهم يطلبوا حاجتهم ببجاحة
3) اعلان معجون اسنان … قصته متخلفة ان مدرسة عاملة مسابقة مين سنانه ناصعة البياض بيطلع ولد من المشاركين عالمسرح و معلمة بتقول انت سنانك صفرا يا عبد الله !!!! تنمر … تنمر … تنمر في حين ان بطل الاعلان اللي ببستخدم المعجون بتاعهم بنصقف له و نحييه ….
4) اعلانات المدن الفظيعة الرهيبة الجميلة اللي اهلها بيظهروا في منتهى السعادة وهو اصلا ٩٥% من المصريين ما يعرفوهاش ، فيبدأوا يتذمروا على حالهم وحياتهم وإحنا ليه مش عايشين كده غير النظرة الطبقيه اللى هتحصل ضد الاطفال اللى عايشين فى الاماكن دى هنبتدى نخاف نقول سكان الرحاب و مدينتى و التجمع وسموحة وكفر عبدة ……الخ
5) ييجي بعدها على طول اعلانات التبرعات اللي اكتر من اوفر وتبعث في النفس كم بؤس رهيب اللي هو ليه الناس دي كلها محتاجة وعجزنا عن مساعدتها ده بيجيب اكتئاب وش وإحنا شايفين في اتجاهات تانية مصاريف لا حصر لها في حاجات لا تم للمطحونين بصلة
6) إعلانات الأطفال المرضى اللي بتظهر التشوه والفقر والمأساة …
! انتوا متخيلين دي ممكن تعمل ايه ف الأطفال لما يشوفوا ناس في نفس سنهم بكم الوجع ده ؟
ارجوكم متفرجوش اطفالكم على الإعلانات دى اعملوا فلتره
و نسيب القوس مفتوح
ماذا ننتظر من اعلام يعلم اولادنا الالفاظ القذرة والاغاني الهابطة وافلام الدعارة
ياسادة انتباه فعلا المجتمع يتحول للاسوأ
