يكتبها ايمن سليم
……
بوست سنوى رسمى بيخسرنى نص البلد ✋لكنها الحقيقة للاسف
…
– أحمد السقا .. اللى مش بتاع دراما لما يبقى معاه مخرج شاطر بيبقى بتاع دراما
– أمير كرارة .. إدينى حظ و إرمينى البحر
– ياسر جلال .. شخصية رحيم كانت رائعة فى مسلسل ظل أكتاف الرئيس السنة دى
– محمد رمضان .. إعلان إتصالات كان هايل بس عايزين مسلسل بقى
– محمد إمام .. إجتهادك واضح جدا بس النتيجة إنك بتفكرنا ببابا برضو
– مصطفى خاطر .. مهو يا تبقى كوميديان يا تبقى ممثل جو أحمد حلمى اللى عايز تعمله ده مش هاينفع
– مصطفى شعبان .. هو كان مسلسل 60 حلقة إسمه أيوب أبو جبل فقسمته نصين 30 السنة اللي فاتت و 30 السنة دي صح ؟
– محمد ممدوح .. انت ممثل شاطر بس اهتم بصحتك عشان لو مش لازماك فإحنا عايزين نمارس أبسط حقوقنا كمشاهدين
– أحمد فهمى .. انت لقيت الكل بيسف قمت جبت آخر السف و هو ده الإفيه
– عمرو سعد .. جميل مسلسل شحاتة عبدالعزيز ولد فضة ده
– ياسمين عبدالعزيز .. أتمنى مايكنش ده آخر نفس بجد عشان أنا ماسمعتش نفس
– مى عزالدين .. الغلط مش عيب لكن المقاوحة عيب خطير
– دنيا سمير غانم .. بدل المسلسل تلاتة و التلاتة مافيهمش مسلسل
– إيمى سمير غانم .. شابو لإصرارك على إنك تكملى تصوير سوبر ميرو للآخر
– حسن الرداد .. ما تاخد إيمى و تروحوا تعملوا هانى مون فى أى حتة بعيدة و ترجعوا كمان سنتين
– حمادة هلال .. انت ابن أصول
– حورية فرغلى .. هى الظروف الصحية برضو هى اللى خلتك تعملى المسلسل ده ؟!
– ياسمين صبرى .. مسلسلك حقيقى أبرز كل إمكانياتك و قدراتك و قدر يعرفنا على كل ألوان الروچ و موديلات اللبس و الأحذية بتاعتك
– على ربيع .. محمد سعد لما فشل كان عنده نجاحات سابقة بتخليه يستمر ، أذكر سبب علمى لوجودك !
– هانى سلامة .. حلو انك واخد تراك لوحدك لو نجحت فإسمك مالكش منافسين و لو فشلت فماحدش هياخد باله
– محمد رجب .. المسلسل هو أكبر علامة إستفهام فى رمضان ، و رغم أنك باذل مجهود فى التمثيل ماحدش فاهم المسلسل
– دينا الشربينى .. ماحدش يختلف على موهبتك و أكيد السنة الجاية هتختارى مسلسل مش مسروق و لا منحوت و فيه أحداث
– غادة عبدالرازق .. مش محتاجة تثبتى إنك ممثلة قوية و قادرة تشيل مسلسل حتى لو بتمثلى فيه لوحدك
– حلا شيحا .. فى حاجة اتعملت جديد فى السنين اللى قولتى فيها أن الفن حرام اسمها ورش تمثيل عشان الممثلين يطوروا من نفسهم اسألى عليها أختك هنا و خديها معاكى
– إيمان العاصى .. شوفى إشتغلتى قد ما اشتغلتى و نفسى فى مرة افتكرلك مشهد و لا إسم شخصية حتى
– أيتن عامر .. الوحيدة اللى عاملة 3 مسلسلات و ماجتش برضو
– أحمد صلاح حسنى .. هو حضرتك الجزء التانى من أمير كرارة و لا فى إيه ؟
– عائشة بن أحمد .. الجزء التانى من درة
– صابرين .. و الله الواحد ما عارف العيب فيكى و لا فى الباروكة !
– الأفضل ( حنان مطاوع – ريهام عبدالغفور – إنچى المقدم – فتحى عبدالوهاب – دياب – محمد على رزق – حمزة العيلى – نهى عابدين – محمود البزاوى – أسماء أبو اليزيد )
– الوجوه الجديدة ( روزالين البيه – على الطيب – ريم سامى – محمد الدقاق – أحمد سلطان )
– المتطورين ( أحمد العوضى – مى عمر – هنا الزاهد – محمد عبدالرحمن – لطيفة فهمى )
– فى جملة قالتها درة فى إعلان العربى ( أحلى حاجة لما الحياة تديكى أكتر ما انتى متوقعة ) صدقتى اقسم بالله !
