كتبت: نرمين نور
أضافت الفنانة “مريم الخشت ” صوره لها من أعلي مبني مستشفي <بهية > الشيخ زايد علي صفحتها الخاص بيها علي مواقع التواصل الإجتماعي عبر ‘أنستجرام’ وتتحدث عن تجربتها بمستشفي “بهية”.
وكتبت : “بما إن النهاردة هو “يوم الناجين من مرض السرطان” ، وبما إن جاتلي الفرصة في رمضان اللي فات، إن اعرف شوية عن “المحاربات” وعن مكان بيقدر يوظف تبرعات الناس لدعمهم بكل الطرق من بداية محاربتهم للمرض لحد ما يتعافوا منه تمامآ ، حابه أكلمكم عن “مستشفى بهية”.
وواصلت: “الناس دي عارفة تتعامل مع كل المشاعر اللي أي ست بتمر بالتجربة دي بتحس بيها، وعارفين يتعاملوا معاها بشكل عظيم ،دول حتي عملو بهية بوتيك * وده بوتيك بيتعرض فيه كل حاجة بتخص الستات من جزم وميكاب وفساتين من مصممين أزياء كبار ،وهدوم لبراندات ومحلات كتيرة ،وأي ست لها كارت معين بتجيب بيه اللي هي عوزاه من البوتيك بكل سهولة”.
واستكملت الخشت كلامها قائلة: “ودا نوع من أنواع« الدعم النفسية» أي محاربة بتمر بالتجربة دي لأن نفسيتها بتكون محبطة جدآ ،وكمان الناس دي فاهمة إن المرض دا لو جه لأي ست هو بيجي للعيلة كلها ، بيعرفوا يتعاملوا مع نفسية أطفالهم وأهاليهم بشكل كبير بيقدر يأثر علي علاجها للأفضل، والحاجه اللي تثبت كل الكلام ده إن رقم مش قليل من الستات “المحاربات ” بعد ما بيخلصو علاج ويتعافوا تمامآ،بتبدأ رحلتهم كمتطوعين مع ستات لسه بادئة الرحله عشان هما أكتر ناس هيحسو بيهم لأنهم مروا بنفس التجربه”.
وتابعت:”زيارتي للمستشفي والتفاصيل اللي عرفتها وشوفتها كبرت فكرة الدعم لفرع« مستشفى بهية» الجديدة اللي بيتبني في الشيخ زايد ،جايه بجد من قلبي لأنه بأذن الله هيعمل أضعاف أضعاف اللي فرع الهرم عمله”.
واختتمت كلامها قائلة: “خصوصآ إن في المستشفي الجديدة هتبقي فيها غرفة عمليات خاصة بالمستشفي ومش هيضطرو يتعاونوا مع مستشفيات تانيه ، وستات كتير محاربات هيقدروا يبقوا أحسن بكتير وده بسبب كل الناس اللي بتتبرع”.
